卷八私情长歌

    [丢砖头]

    丢砖头了搬子场。弗曾听我情哥说一声。我间羹汤篮提子个糠虾来里眼泪出。升箩里坐子蚕茧细思量。

    （白）细思量。细思量。我里个情哥是个铁心肠。我搬来里子一个月日。你也弗直得来看看张张。料道弗离个苏松常镇庐夙淮扬。奢个来个铜关口外。远处他方。你弗见我又结识子别个依先快活。正弗知我歇歇思量。

    （歌）正是莲蓬梗打人拚子私情断。我是砻糠里破鱼取肚肠。

    [田]

    姐儿私房有个丘三角田，自小收拾在身边。忽朝一日无钱用，将田要典我郎钱。

    （白）郎道姐儿呀，我有个钱，典你个田。要还我四扯明白，罗里连牵。姐道郎呀，我有个田，典你个钱。自然还你四扯明白，罗里连牵。东址白膀湾，西址大腿边。南址三岔路口，北址肚家门前。又好插个光头糯，又好种个硬梗鲜。

    （歌）我个郎呀，你要日里拔秧夜里莳，凭你荒年没荒子我个丘田。

    [船]

    昨夜同郎做头眠，干红栏子合腮肩。四只膀儿好象鳗鲤叉，橹人正对子填脐边。

    （白）填脐边，填脐边，妆子橹掣便摇船。推个推来扳个扳，掀铃吭郎浪头颠。颠的饭潭眼里侪是水，利市头上弗曾干。打湿子一领鬃蓑衣犹自可，袱包正挂在橄堂前。

    （歌）郎道姐儿呀，我替你前长后短个样事物尽丢开了手，且拔起子枚头抹干净子个只船。

    [木梳]

    结识私情好像木梳能。我侬枉子听你介相思结发情。

    （白）吃个镜子来里做眼。编筐着弗得个蓬尘。牙刷子只等你开口。绊头带来里缱筋。眉刷弗住介掠来掠去。刮舌又介掀嘴撩唇。朗梳斜连霹脚后跟赶上。剔帚来得殷勤。

    （歌）姐道郎呀。我听你一通两通也只是空来往。到弗如肥皂光光滚着子身。

    [蒸笼]

    结识私情像蒸笼。要我肉面相逢弗放空。因为你会安排落来你个圈套里。未曾动火气冲冲。

    （白）气冲冲。气冲冲。思思切切在心中。我为你受子几呵头头脑尽阁在肚里。长长短短侪听你包容。我曾经九蒸三烧。弗是一窍弗通。你人门前捉我团团搦搦。我并弗会恨究。弄得我肚里有酿。我也只弗走风。那你常时在我面上淘气做身分。馒头倒大子蒸笼。思量更介弗好。到弗如傍热拆散子罢。省得后来冷气直冲。

    （歌）姐道郎呀。我只指望你火气退时依还听你重相聚。罗得知后来原哄得我精空。

    [钻子]

    郎儿生来好象钻子一般般，吃渠拿个软麻绳缠住子了弗放宽。上箍下箍箍紧子我，你自家快活没拨来别人钻。

    （白）别人钻，别人钻，我郎消遣子我介两三番。和身靠紧我来用力，一双眼睛弗住介捉我来关关。你个心上测得火着，我倒有气无烟。那便用斤把力，再歇歇四手乖瘫。

    （歌）姐道我郎呀，消进消出，吃你尖酸头弄大子我个眼，两人绞热子了屑来孔门边。

    [求老公]

    来个姐儿上穿青。下穿红。手拿香盒过桥东。路上行人问道。姐儿你在罗里去。我到处烧香求老公。

    （白）别人家嫁个老公七伶俐。八玲珑。又长又大又充同。偏有小阿奴奴年灾月悔。命犯孤穷。嫁着子介个乌龟王八。生得又麻又瞎又痴又聋。上床好似背板牵。下床好似鸡踏雄。昨夜一更后。二更中。爬来小阿奴奴头边来学打雄。髭须触痛子奴个嘴。鼻涕流来累子奴个胸。惹得小阿奴奴心性发。一脚踢倒在里床东。

    （歌）只有五更头小阿奴奴熬弗得。捉渠童装只一摸。好似烟熏萝卜火烧葱。

    （皂罗袍）这般模样。教我怎容。因此别寻一个好家公。

    [竹夫人]

    做人弗要像个竹夫人。受只多少炎凉自在心。硬子骨头开子眼。看我人情势败像秋云。

    （白）像秋云。像秋云。小阿奴奴原弗是低微下贱人。你只知我今日个落运。弗知我当初个出身。乔松是我前辈。梅花是我随身。清风是我好友。明月是我佳宾。当初个伯夷叔齐也是我里远祖。湘妃也是我里至亲。且喜子孙繁盛。历代有介星清名。也有人喜欢我个高节。也有人赏鉴我个知音。弗匡撞子个恶作篾片。拖出山林。捉我出皮剔骨。我只是开心见诚。捏得我两头弗露。做得我出路无门。露出子多少眼目。又陪子两个小心。挑我来十字街头东卖也弗要。西卖也弗成。弗识货个见子我七孔八窍一个光棍。识货个见子我玲玲珑珑一个凉人。增钱买我家去。和我来红纱帐子里安身。掰子我恩恩爱爱。勾子我殷殷勤勤。掰子我汗弗离身。勾子我手弗离颈。指望百年同到老。罗道七月七立秋之日。风波当时起。恶念容易兴。娘子官人咦道我碰脚绊手。丫头阿姐咦咒我离眼别睛。横弗中渠个意。竖弗像渠个心。一射射我来门阁落里。累子我满身个蓬尘。我吃个伤心了唱介两句曲子。自家叹个自身。

    （排歌）亏心汉。薄情人。谁知转眼就无情。

    （歌）世上弗是有子秋冬无春夏。你搭个起得时人休笑我失时人。

    [汤婆子竹夫人相骂]

    姐儿馒团贝垃像汤婆。人门前稳重又温和。未到黄昏捉我捕了摸。拿我肚皮常滚得我急箍箍。

    （白）急箍箍。急箍箍。情哥郎派赖忒无徒。当初拿子小阿奴奴好似珍珠玛瑙。活宝珊瑚。道是我热闸闸介有趣。暖烘烘介对科。弗比熏笼介碍事。又强如火炭个脚炉。被里时常相会。席上弗住介揩磨。我指望搭你无个分开日脚。罗得知立子春来看看捉我冷疏。丢我来踏板上理也弗理。瞅也弗瞅。一夜子搭个家主婆困在床上。说道会。了你弗欢喜子个汤家里个。再说道渠个年纪忒多。汤婆听得。眼泪直铺。官人呀。

    （黄莺儿）名色号汤婆。戊戌生。年不多。汤家还是我的亲生父。我只为热心肠似火。俏冤家爱我。苦怜我被窝中准夜如牵磨。一脚就碾开奴。到如今经风露水。你心上道如何。

    （白）说郎弗转。自跌个胸脯。恨我里个爷娘弄得我一点无个还覆。枉子你也来我个面上废子多少工夫。我间拨来别人介轻贱。算来长情倒弗如酒注茶壶。

    （歌）姐道郎呀。寒寒冷冷护子你多少脚。间倒捉个竹夫人做子小家婆。

    竹夫人听得子气膨膨。出口就骂老惜春。你是冬来我是夏。缘何牵扰阿娘身。

    （白）阿娘身。阿娘身。惯要来个人前说别人。几次人前说我懒朴要困。个是家主公欢喜我个风情。你未到黄昏就叛来个被里。我看你奢上头个点动紧。

    汤婆子说道。亏你羞也弗识。自道风情。我看你精赤洒洒。无介点趣向。弗如个老太婆包包扎扎有介两件衣身。

    竹夫人说道。杨梅干吃介两个。忒煞恶心。包包扎扎便是布头布脑。有要绿袄红裙。吃个张官人耍落你个意利好像汁罐。吃个李大舍说你个气质就似汤瓶。

    汤婆子当面一啐。你好像灯台弗照自身。我近看子你活像个炭嘟个嘴脸。我远看子你好似蟹断个绒形。阁子家主公多少个毛腿。听子家主婆几呵个风声。

    竹夫人便说道。我强如你吞个家主婆个双臭脚。强如你做个家主公帮丁。我生来眼目清爽。肚里一点小心。短弗局促。长弗伶仃。壮弗擂堆。瘦弗薄轻。

    汤婆子说道。我骨格重你两两。我价色多是你十分。凭你说我悭吝。强如你篾片个妖精。

    两个相争斗殴。搂子一个黄昏。罗道是个家主婆听得。喝骂高声。一个无介点大小。一个弗让介点卑尊。两个侪跪来搭。直到更尽夜深。汤婆子对子个竹夫人纽嘴纽面。竹夫人就说起前因。

    （黄莺儿）想起旧恩情。竹夫人。浪得名。虽与他同床不得同衾枕。搂抱我在身。心儿里感承。谁知不久成孤零。悔初心。只为趋炎附势。如今落得冷清清。

    （白）罗道是个家主公听得。竹夫人说得伤心。

    （歌）家主公喝子竹夫人起来。你下遭再弗许你个样劈竹性。汤婆子。你弗许你热绰绰乱搂要温存。

    [笼灯]

    姐儿生来像笼灯。有量情哥捉我寻。因为偷光犯子个事。后来忒底坏奴名。

    （白）坏奴名。坏奴名。阿奴细说我郎君。你正日介来张头望颈。眼看奴身。你道是我短又弗局蹴。长又弗伶仃。因是更了我听你有子个情意。一日子月黑夜暗子我就奔。也弗管三更半夜。也弗管雨落天阴。也弗管地下个沟荡。挨过子多少个巷门。也弗管个更铺里个夜夫。也弗怕路上撞着子个巡兵。金锣一响。吓得我冷汗淋身。一到到子屋里。我方才得个放心。罗道是伴得你年把也弗上。你就要弃旧恋新。屈来罗里说起。撞你介个贼精。郎道你弗要辞劳叹苦。懊悔连声。你当初白白净净。紫气腾腾。你间浑身好像个油篓。满面拌子个灰尘。人门前全勿骛好。头上箍子介条草绳。夜里只好拿你来应急... -->>
本章未完，点击下一页继续阅读